El' l' histoère qu'ej’ m 'in vos vous raconter in' hui, al’ s'est passée i y o deux campagnes.
Ch' est eine histoère ed' cacheux, o z'allez m' dire, éq ch 'est des mintiries. Ej’ préférrouais in tcherre roéde, si a n'étouait point vrai !
Ch'étouait el' l'ennée où qu'el’ cache a l'o étié fremée eine dizaine ed' jornées, à coeuse qui y' avouait trou d'gibier (acht'teure a l'est fremée, vu qui n y o pus errien dins chés camps…)

I f’zouait moins tchinze, ed pus eine poère ed jours. Tous chés z'intailles, i z'étouaientt' églées : chés Jones, i pouvouaientt’ glicher d'sus. D'no timps, on glichoème, après l’ école su'l'mare, qu'al' étouait sus l' plache. Malheureuz'mint, a l'o été r’ bouchée, pour y fouère un «Parkinge», con'me i dittent dins ch' bieu monde. I y' avouait moins ed'danger eq'lo, infin... On n’ pourro point r fouére el'l 'histoère. I feut vive avu sin timps , qui diz'tent chés geins amateux ed Progrés (chés z'eutes, ch'est des réveux ou des mitans d’ fous... ed z'étringers dins leus poéyis...)
Con'me éj vous dizouais, tous chés z'intailles étouaientt' er’couvertes par tchinze cheintimétes ed' glache. Ch'étouait un mercredi, ej’ m’ in allouais fouaire un tchot tour dins ch'marais ed'Coeuchie, histoére ed passer un tchot momeint.

Ej’ n'étouais point coére ach'treu Bourgeois, eq y j’intinds butcher dins ch’ fond, du côté ed’ Pink'ny ; pis pourtant ech'vint, i v'nouait ed' Tinincourt. A n’ pouvouait point t'ête un pic vert dins un abbe. Coé qu'ch'étouait alors ? à vo idiée ?
Ej` preinds ch'riou d'ech Pont Mathon, j'èl suis sus deux cheints métes : toujours el’ min'me bruit, ed pus in pus fort !
J'arriv’ al' Longue intalle ; coé qu'éj’ voé ? ... min camarad’ Tchot Vé , in plein mitan d'es' n' intaille, in train d’berziller l’glache avu eine masse !
Sus l'coeup, a foué drôl’ ed'vir cho, et pis a vous don’ne eine es'cousse à vo tcheur. Eh ! si l’glache al' casse d'un seul coeup : el' vlo dins ch’ fond, et pis ch'est por seur, eine congestion ou bien un infractusse. Tchot Vé qui l'est un mollé avinturier, i n’ pinse jamouais ach’ dinger : i n’ y o eq'quind i l'est dins l'ieu qui l'trouv’ mouillée... Ah ! qué wêpe !

J'aime autint vous dire eq' tchot Vé, i l'avouait coeud sus l’ glache : i l'étouait in pile et manche !
Quind i l'o ieu fini d' fouère un tchot treu, i l’o preind un passant et pis i s'est mis à soéyer l’ glache par tchots morcieux.
J’y dis conme cho : - T'es tcheut sus t'téte tchot Vé, eu soin à ti, tu vos t'noéyer
Tchot Vé : - Ah t'es lo ti... n'té casse point t'tête, i y o un boin diu por chés cacheux, pis i parouait qu'el cache al rouve al s'maine chi, alors i feut qu'ej fouèche d'el l'ieu, sinon ché canards i n' s poz’ront point à m'hutte».

Tout l' l'après midi, jusqu'à la brune, tchot Vé, i l'o butché, soyé, inl'vé des morcieux. Au soère i l' avouait réussi à déglacher un carré, deux foés con'me sin batieu. !
Qué d'mo, por point grand coze !... Mais ch’ pus bieu dins no histoère, ch'est qu'el'nuit 1o, i l'o foué moins vinte, et pis qu'el lind'min, tchot Vé, i n'o pus ieu qu'à r’ preindre esse masse, pis sin passant...