Ah ! qui l'est ti conteint, tchot Vé, quind y l'est dins sin Marais ! Y n'y o point pus hureux eq’ li... Par tous chés teimps, ché l'o qu'o l'trouve : qui neige, qui vinte, qui pluve, qui gèle, qui tchèche des grêles comme sin peu, s'vie, ché s'z'intailles, chés balanches et pis ch'reste...
Même qu'él cache a l'est freumée, i vient coère, à m'sure y coutcher par nuit. Quind o z’aime tchèq’coze ach point lo, o passe souveint pour in mitan ed'fou ; mais li a n'y foué errien : « Veut miux foère comme mi, eq'passeu sin teimps à dégouéser ed'sin voésan » qu' i dit.

Rév'nons à no histoère.
Ach' dargni coeup ed' six z’heures ach' clotcher éd Coeuchie, eine beinde d'oés év'nant ed' Pink'ny, à s'met à torner sus ch' Marais.
Ch' père : « - Por seur , y gn'in o in cheint ! Y n' s' poseront jamouais dins no intaille, al est trou tchotte , y vont alleu al’ grande hutte !
Tchot Vé : - Ch' est drôle, on n’inteind mi leu canardière !
Ch' père : -T'indeinds ! O dirouait eq' chés z'oés y r'torn' tent.
Tchot Vé : - T'o raison pa, y vont passeu au d'sus ed' nous... »
Troés foés, chés zoés y z'ont torné sus ch' Marais sins leu pozeu : chés Grises, él I'Intaille à Cot, él cabenne à Mossieu Reytinat, ech' trou à Bléries, ech' Pont ed' Bos' el' Grande Intaille, chés Pipettes, el' grande Bassure, él’Longue...
Al' Troézième foé, tchot Vé y dit à sin père : «éj m'in vos sortir, à m'sure éj’ porrais in tireu eine au vol.
Tout douch' meint, no cacheu y sort sins clatcher el' porte.
À pos ed' leup, y l'avanche in mollé, et pis y s'muche drière eine épeine blanque. Eine poule d’ieu qu'al étouait étampie lo, al' s'invole tout’ épaveudée : «têt' té vieil’ glenne» qui l’y dit tchot Vé.

A ch’ momeint lo, chés zoés, o dirouait qui vont leu poseu al' Grande Intaille.

« Du chuque! jé m'sus inglé por des pronnes» peinse Tchot Vé, mais d'un seul coeup , chés zoés i r' montent, et pis i vont tcherre dins l’ bassure, à chint mètes ed’li, drière un boutchet ed' seules. Oh ! qué l’affouére ! Tchot Vé i n' perd point él' nord : i s'agrouille et pis i l’ec'mainche à avancher dins chés rozieux. Tous les troés, quat' pos, i s'arrête, teind s' nér'érelle por n'point s'z' effaroucheu. .
A mitan ec'min, i s'couque sus s'panche et pis él' v'lo parti comme in 14. Jé n’conouais point grameint ed' cacheus ed' Coeuchie qui frouaientt' chinquante mètes dins l’neige, sus leu panche, par moins tchinze ! Ché un coeup à attraper eine fleuxion ed' poétrenne.

Arrivé à treinte mètes d'èch troupieu, ech' chef qui milouait autor ed’li, y r'drèche,sin long coeu.

Tcho Vé, peinsant à part li, éq'chés z'oés i vont leu s’involer, i preint sin tromblon... I n'put quazimeint pus l’et'nir, tellement qui l’o ses doègts inglés. i l'épeule ; avu du mo, i trouve chés tchiens. Pan, pan, chés coeups déclaq’tent juste ach' momeint où chés zoés i z’allouaient s'involer.
Tchot Vé, avu bié du mo, i s'erlève...

Oh ! mirac', là bo, dins l’neige, eine oé, étampie, roède morte.

Si o l'avouaitt' vu, ach' momeint lo, o z'orouaientt' seu ch' qué ch' étouait un homme hureux. I l'imbrassouait, i l'l'afflatouait : « ém' tchotte, oé' ! ém' tchotte oé !...» qui dizouait quazimeint in brai’yant !

A chés coeups ed' fu, sin père i s'est satché d'èl l'hutte.

In l'voéyant trimpé, et pis in r’baiyant èl' trache laissiée dins l' neige, i li dit : « T'es tcheu sus t'tête, tu vos attrapeu ch' qui n' feut point, reinte t'ercanger !...»

Croèyez-mé a n'étouait point s'première, mais él l'oé d'ech' jor ed' l’an 1979, Tchot Vé i n'el' l'oubliero jamouais !

Ech’ marister éd ’Coeuchie