Histoère n° 4 in picard

Chés z' érins

In n'hüy, in r'bayant l'gazette, jé m'su déclatché à rire, in voéyant, eq’min camarad’ Dheilly, ch' marister ed San-Maulvis, i l'o acaté des pronnes pus tchères dins ch'midi qu'à sin poéys.

Si o déchindé par lo por gagni ch'million, o vous berlurez ! À part chés coeups ed' so lé, o n'vos don-ne errien. O direz qu'ach t'heure, i n'y o pus qu'cho qui conte ! I feut rintré à s'moéson, noère con-me un pron-nieu ! I feut s'zé vir, étampis sus ch'sabe : sus leus penches ou sus leus dous ! O dirouait des z'érins qu'on fouait tchuire dins ch'clate, ed'sus un grill’. Ch'pus risibe, ch'est eq' chés gins d'èch poèys lo, i s'muchtent,.. I n'sort'té qu'au clore. Leus moésons, je n'sais point à coeuse qu'i z'ont des f’nètes, vu qu'chés persiennes i sont freumées tou l'jornée...
I n'sont point tcheus sus leus têtes: i sav’tent eq'si, i veut'té coère avoère eine belle pieu, quind i s'ront vius, i feut s'mucher ! Er'martchez qué j'fouais parelle ! j'preinds min tchot cado ed' toèle, ch'Corrier picard et pis jé m' mé au l'ombe. À m'sure, je s'z'erbé tchuire;si dins eine poère d'ennées, i z'ont leu pieu tout ridiée, i z'auront qu'a taper sus leu penche...

Chés trinte et eine jornées d'ech moé, i s’ersan'n'té tertous : chés z'érins i s'arriv'tent après meingé, un molé (point grameint, vu qu'ach t'heure i.n'feut point t'ète gras), i sont cartchés con-me des beudets: un batieu, des toèles, des cados et pis un tchot tube qui coûte fin tcher por dév'nir pus vite noéres. I s'e n'étal’te un molé dins tous chés ratchüins, et pis l'grillade a l’ pu ec'mincher,... J'arrète lo à coeuse ed' chès gosses qui pourouaientt' nous eintinde ! O n'in voé des drôles d'érins…

Aux z’alintours ed' 6 z’heures, i s'in r'tourn'tent, dins leus tchottes cabennes ed' toèle . Pindent tou l'l'ennée i sont dins des cabennes à lapans, au moé d'a-out, i sont dins des cabenncs ed' toèle ! Allez com-preindre quéq'coze ! I z'ont vite foué d'acater à souper :d'el'purée in patchet, du lait in poude, quéq’foé des pronnes si a n’'sont point trop tchères…Quind i z’ont avalé leu tchot r'pos, i fouaientt’ un tchot tour dins s'z'alintours ; vu qu'i n'y o point d'télé chès gosses i s'in-nuitent, i s'battent, chés pareints , i s’chamaill'tent ! Coère eine belle soèrée ! I vont coutcher in disant qu'i foé trop coeud, à m'zure i prenn'tent des tchottes pillules.

Ch'est au momeint où-chatchun ec'minche à freumer ses yux, eq' chés pus jon-nes i s'mette à braire" têtte té ! Cré tonnerre d'agache !...cochon d'gosse !... ch'est point du r'pos, l'énnée tchi vient, t'iros in colonie... "Eine foé qu'i y o in gosse qui lanche esse canchon, tous s'z'eutes i suitent ! Autremeint dit, i feut s’é l'ver.Er'martchez qu'i z'ont point l'pire plache: i vont r' trouver chès copains por juer à boules, pindant ch'teimps lo, chés blancs bonnets i débrenn'tent !

Après l'partie, i vont preinde un tchot "pastis" (ou bien 2). Pour peu qu'i tchètte sus un copain d'el campagne passée, i prenn'tent èine rinchette ! L'heure al passe, l'famme al romion-ne. In reintrant, i vo n'n'intinde...Peinsez : i feut qu'à deux z'heures i r'tourn'tent foère l'érin.Tout ch'moé i passe conmme cho ; heureuz'mint qu'i vont pouvoère s'erpozer in reintrant à leus bureaux ! Avin i feudro raconter a leu mode leus congés; ch'est a ch'ti qui éro vu ch'pus bieu chi, ch'pus bieu cho ; ch' ti qui s'ro ch'pus noère….infin, à n'm’erbé point, j'sus in trin ed dégouézer.

Amis, qu’o z'allez pertir, i n'feut point avoère peur ed rintrer palots, et pis si o croèyez eq chès geins i vont s'motcher d'vous si o n'êtes point tchuits à foé éj'm'in vo vous donner un boin conseill’:allez vir d'em part, ech carbonnier ed Pinkny : Ch’Michel Raux ou bien sin fiu, i l'habit’ Coeuchie, d'mandé z'i un boulet "troés barres " ou bien eine tchotte boète ed suie et pis peinturlurez vo pieu avu...
A vo bureau , o s'rez, ch’est seur, ch'pus bieu … érin !