Quind o z'est tchot, on crouait à toute ! A malèze ach' «Pèr’ Néél» ! Ermartchez, à tous s' z'âges, on crouait à tchèckoze : à tchinze ans, ch'est à chés filles, pis à soiéssante-tchinze, on crouait qu'on n'mourro point... ! Et pis j'pourrouais vous z'in dire d'eutes, infin, mais ch'est point ch' jour !

Ervenons à no histoère ! Dins l'temps, on racontouait à chés nazus qu'éch' Pèr’ Néél i v'nouait avu ein traînieu (min-me si y avouait point d'nèje...) pis qu'i passouait dins l’ecminée, leu apporter ein patchet d'chuque, pis eine orange... I l'aurouait ieu pu vite fouait ed rintrer pal' porte ! Infin...

Au fur à m'zure, qu'chés z'ecminées i z'ont raptchoti, chés nazus i z'ont ieu ed'pus in pus d'jeuets ! C'mint qu'i pouvouait fouaire, ech' pauv' r'hon-me, pour passier d'ein ch' tuyieu ed'poële ?

Ach'teur, i n'y o quazimint pus d'ecminées vu qu'chés fus i sont alectriques. On n'vo quind même point l'fouaire arriver dins chés fils ! Portant, on dit coère à chés tchots, qu'i pass'rot pal'l'ecminée ; bon, o direz qu'achteur, i l'o moins d'mo, vu qu'i vient ein avion, ou ein fusée ! Jé n'sais point ouq' ch'est qui met s'cargaison d'juets pour toul' monde ! I z'in n'ont tellemint !

Ch'est pus conme ed' no timps ! In pusse, i n'sav’tent té pus coé fouaire avu : i déball' té toute, pis i font souvint conme ech' fiu ed' min voézin, l’ennée passée, qui l'o jué avu chés boètes, toul' timps qu'sin pèr’ i juait a vu ch' train !

Ej' dis tout cho, mais j'voudrouais coère ète tchot, passeque ch'est bieu Néél !