Ch' Toène : - Dis, tchot Mond, el' nuit-chi, j'ai foué un drol' dé rêv'... J'ai rêvé d'ti ! J'étouais mort, pis j'arrivouais à ch' Paradis. J' rinte dins eine tchotte pièche, Saint-Pierre i s'approche éd' mi, i d'mande min nom, j'y dis : ch' Toène.

Saint-Pierre, i gratt' esse tête, pis i dit : - Ch' Toène, ch' Toène... Cha m' dit quèc'coze ! Ah oué, ch' Toène éd Grat'panch’ ! Ah ! jé n' pus point t'preinde ! Avu tous chés fâmmes eq' t'os ieu, i feut qu' éj té mèche à l'épreuv' eine poère d'ennées, pis après on voérons ... Tu t'in vos vive avu tchotte Berthe chonq’ ennées, erviens m'vir après...

Ch' Toène : - Ch'est point possib', mein boin Saint-Pierre, éj' n'ai ieu qu' des belles fâmmes, jé n' porrai jamouais ...

Saint-Pierre : - Ch'est pour et' punir qu'éj' fouais cho, chi tu n' vus point, t'iros vir ch' Diab ein infer, pi fouaire du fu avu li ! T’aimoais bien fouaire du fu advant ?

Ch' Toène :(s'adressant à tchot Mond) - J' m'in vos r'joinde tchotte Berthe… J’vu point finir dins ch’fu, i fouait trop coeud... Pour eine punition, ch' est eine punition ! Côme i feut passer ch' temps, on vo s' prom'ner... Dins ch' Purgatoère, i y o des villes con'me sur terre. J' èm promène souvint, et d'un seul keup, j' té voé, ti, tchot Mond avu eine poupée a, ia, ialle ! J'ém dis qu'i y o point d' justice ! Ej' m'in vos r’vir Saint-Pierre. J'i dis : Min bouin Saint-Pierre, j’n’y compreinds errien, j' viens d' vir ein copain d' min poéys, tchot Mond qui s'appelle, avu eine poupée... J'él conouais, il o ieu pus d'fâmmes éq' mi, j'én' compreinds point, mi j'sus avu un laidron, pi li avu eine fâmme comme j'é n'ai jamouas ieu ! I y o point d'justice !

Alors, Saint-Pierre i m' dit : - N' dis point cho, ch’Toène, à ch' Paradis, i y o eine justice ! Ch'est point li qu' éj voulouais punir' ; ch'est elle !